मुम्बई(एजेन्सी)– बलिउडका महानायक अमिताभ बच्चन अभिनित फिल्म ‘हम’ प्रदर्शनको तीस वर्ष पुगेको छ । यो फिल्मको गीत ‘जुम्मा चुम्मा दे दे’ सर्वाधिक लोकप्रिय बनेको थियो ।

यो गीत यति लोकप्रिय भए पनि गीत रेकर्डको समयको अप्ठ्यारो सायदै कमैलाई मात्र थाहा होला । गीतका गायक सुदेश भोसलेका अनुसार यो गीत १७ घण्टामा तयार भएको थियो ।

‘मैले फिल्म मुकद्दरका सिकन्दरमा अमिताभका लागि गीत गाएको थिएँ । त्यसपछि सबैले मेरो स्वर मनपराए र जुम्मा चुम्मा दे देका लागि मलाई गाउन अफर आयो’, हालैको एक अन्तरवार्तामा उनले भनेका छन्, ‘यो गीतका लागि म अमितजीको अगाडि बसें र उनका लागि गीत गाएँ । मेरो स्वर सुन्ने बित्तिकै अचम्ममा परेर यो गीत रेकर्डको लागि बोलाए । हामीले यो गीत मेहबूब स्टुडियोमा ७० देखि ८० को संख्यामा रहेका वाद्यवादकका साथ रेकर्ड गरायौं । यो रेकर्ड बिहान नौ बजेदेखि रातीको दुई बजेसम्म चलेको थियो ।’

सुदेशले गीत रेकर्ड गर्दा आफूले २५ कप चिया पिएको खुलाए । यो गीत सार्वजनिक भएसँगै सुदेशको करियरमा कायापलट नै भयो । यो फिल्ममा अमिताभसँगै रजनीकान्त, गोविन्दा, किमी काटकर, दीपा शाही, शिल्पा शिरोडकर, डेनी डेन्जोङपा, कादर खान, अनुपम खेर र अन्नु कपुरको अभिनय थियो ।