काठमाडौं- बहुप्रतीक्षित हलिउड फिल्म ‘एभेन्जर्सः इन्डगेम’ आउँदो शुक्रवारबाट रिलिज हुँदैछ । रिलिजको दुई दिनअघि अग्रिम बुकिङ खुलेको यो फिल्मको  बूकिङ आक्रामक देखिएको छ । अग्रिम बुकिङ खुलाएका कतिपय मल्टिप्लेक्स हलका आधिकारिक वेबसाइट ‘डाउन’ भएका छन् ।

कुनै वेबसाइटको क्षमताभन्दा धेरै प्रयोगकर्ताले एकसाथ साइट खोले भने साइट डाउन हुने या सुस्त हुने गर्छ ।

मल्टिप्लेक्स हलमा सबैभन्दा ठूलो च्यानल भएको क्युएफएक्स सिनेमाको वेबसाइट ‘डाउन’ भएको छ । क्युएफएक्सले भने दिउँसो वेबसाइट अपग्रेड गर्न लागिएको बताएको थियो । बुधवार दिनभरि अपग्रेड गर्ने भनेको साइट साँझसम्म पनि खुलेन ।

क्युएफएक्सले फिल्मको अग्रिम बुकिङ खुलाएको थियो । तर, साइट ‘डाउन’ हुँदा दर्शकहरू‌ले आक्रोश व्यक्त गरेका छन् । केही प्रतीक्षित दर्शकले हलमा लाइन लागेर नै टिकट लिएका छन् ।

यस्तै कमलपोखरीमा रहेको बिग मुभिजको साइट पनि डाउन भएको छ । यो साइट पनि दिउँसो दिनभरि डाउन भयो । फिल्मको लामो समयदेखि प्रतीक्षा गरिरहेका दर्शकले बुधवार बूकिङ खुल्ने सूचना पाएपछि बिहानैदेखि यी साइट भिजिट गर्ने प्रयास गरेका छन् ।

यता दिउँसो चाबहिलमा रहेको एफक्युब सिनेमाजको साइट ढिलो खुल्ने समस्या आए पनि साँझ भने राम्रो चलिरहेको छ । यहाँका केही ‘शो’ मा टिकट सोल्ड आउट भइसकेका छन् ।

दरबार मार्गको क्युज सिनेमा र गोंगबुमा रहेको बीएसआर मुभिजका साइट भने खुलिरहेका छन् । यी हलमा पनि बूकिङ खुलेको छोटो समयमा नै धेरै टिकट विक्री भइसकेका छन् ।

यो फिल्मले छिमेकी देश भारतमा पनि आक्रामक बूकिङ गरेको थियो । भारतमा यो फिल्मको एक सेकेन्डमा १८ वटासम्म टिकट विक्री भएको भारतीय मिडियाले जनाएका छन् । यस्तै चीनमा पनि फिल्मको बूकिङ निकै आक्रामक देखिएको थियो । विश्वका कैयन् ठाउँमा यो फिल्मले टिकट बूकिङमा रेकर्ड नै बनाएको छ ।

‘एभेन्जर्सः इन्डगेम’ को नेपाली दर्शकमा पनि लामो समयदेखि प्रतीक्षा छ । फिल्ममा कैयन् सुपरहिरोहरु हुनेछन्, जो मार्भलको ब्रह्माण्डमा युद्ध गरिरहेका हुनेछन् ।