भैरहवा– अर्थमन्त्री विष्णु पौडेलले प्रतिनिधि सभा पुनर्स्थापनाको कुनै सम्भावना नरहेको जनाएका छन ।

मुलुक निर्वाचनतर्फ अग्रसर भैसकेकाले प्रतिनिधि सभा पुनर्स्थापनाको माग सहित सडक आन्दोलन गर्नुको औचित्य नभएको बताएका हुन ।

भैरहवास्थित गौतमबुद्ध विमानस्थलमा प्रेस संगठन नेपालले मंगलबार गरेको पत्रकार सम्मेलनमा बोल्दै अर्थमन्त्री पौडेलले भने, ‘कतिपयलाई अझै पनि संसद पुनर्स्थापना हुन्छ कि भन्ने भ्रम होला, संविधान बमोजिम नै संसद विघटन भएकाले पुनर्स्थापना हुँदैन बरु चुनावको तयारीमा जुट्नुस ।’

उनले संसद विघटनसम्बन्धी मुद्दा सर्वोच्चमा विचाराधीन रहेकाले अदालतको फैसलालाई सम्मान बताए ।

‘वैशाख १७ र २७ गते नै निर्वाचन हुन्छ, यसका लागि कसैले भ्रम पाल्नु जरूरी छैन’,उनले भने।

सरकारले प्रतिनिधि सभा विघटन गरिसकेपछि यो विषयमा सर्वोच्चमा पुगिसकेको हुँदा पुनर्स्थापनाका लागि सडकमा आन्दोलन गर्नुको औचित्य नहुने बताए ।

उनले निर्वाचन आयोगले चुनावको तयारी अगाडि बढाएको र सुरक्षा निकायले पनि तयारी थालेको भन्दै अब निर्वाचन रोक्ने तागत कसैसँग नरहेको बताए।