काठमाडौँ- राष्ट्रिय महिला लिगमा नेपाल पुलिस क्लबले वालिङ नगरपालिकासँग अंक बाडेको छ। मंगलबार सातदोबाटोस्थित एन्फा मैदानमा पुलिस र वालिङबीचको खेल १-१ गोल बराबरी भएको हो।

तीन विदेशी खेलाडीसहित मैदान उत्रिएको वालिङ पुलिसविरुद्व हावी भएको थियो। जसमा पहिलो हाफ गोलरहित बराबरी भएको थियो।

खेलको दोस्रो हाफको ८ औँ मिनेटमा वालिङका लागि मिथो रुथले गोल गर्दै टिमलाई अग्रता दिलाएकी थिइन्। रुथको गोलपछि उत्साहित वालिङको टोलीले अग्रता भने धेरै टिकाउन सकेन।

वालिङविरुद्व खेलको ६५ औँ मिनेटमा पुलिसकी रेखा पौडेलले गोल फर्काइन्। रेखाको गोलले खेलमा फर्किएको पुलिसले गोल थप्न भने सकेन। जसको फलस्वरूप खेल १-१ बराबरीमा सकियो।

प्रतियोगितामा दोस्रो बराबरी खेलेको वालिङका प्रशिक्षक दीलिप थापाले आफ्नो टोलीका खेलाडीले राम्रो खेलेको बताए भने लिगमा दुई बराबरी खेलेको पुलिसका प्रशिक्षक सञ्जीव जोशीले टिमले राम्रो खेल्न नसकेको स्वीकाररेका छन्।

उनले वालिङका खेलाडीले राम्रो खेल्दा आफ्नो टिमले नतिजा उल्टाउन नसकेको स्वीकारेका हुन्। यस्तै पुलिस ५ अंकसहित पुलिस दोस्रो स्थान उक्लिएको छ। वालिङले ३ खेलबाट २ अंक जोडेको छ ।