काठमाडौं- हरर जानरामा निर्माण गरिएको चलचित्र ‘कठपुतली’को फस्ट लुक सार्वजनिक गरिएको छ । निर्माण टिमले फिल्मको बिम्ब झल्काउने फस्ट लूक बुधवार सार्वजनिक गरेको हो ।

कुनै एक समयमा एक राज्यमा शासन गर्ने राजा र उनको दरबार वरिपरि रहेर तयार पारिएको कथा हरर र काल्पनिक भएको बताइएको छ ।

फिल्मलाई मौलिक कथामा रहेर तयार पारिएको हरर फिल्म भनिएको छ । फिल्मकी कार्यकारी निर्माता सम्पदा मल्लले यो फिल्म अहिले हेर्दै आइरहेका फिल्मभन्दा फरक भएको जानकारी गराइन् ।

फिल्मको निर्देशन भीमसेन लामाले गरेका हुन् । यसअघि उनले लघु चलचित्र निर्माण गरेर चर्चा कमाएका थिए । निर्देशक लामाले यो फिल्मलाई आफ्नो ‘ड्रिम प्रोजेक्ट’ भएको बताए । गौरी मल्ल, मिथिला शर्मा, कर्मा, शिल्पा माष्के, उषा रजक, सुवर्ण थापा लगायतका अन्य कलाकारहरुको शीर्ष भूमिका रहेको यो फिल्मको यतिबेला पोस्ट प्रोडक्सनको काम भइरहेको बताइएको छ । पोस्ट प्रोडक्सनको काम लण्डनमा भइरहेको छ ।

फिल्मलाई प्राविधिक रुपमा पनि बलियो बनाउन खोजेको बताइएको छ ।

यो फिल्मलाई पृथ्बी राना मगर र ईश्वर राईले निर्माण गरेका हुन् । फिल्मको प्रदर्शन यसै वर्ष हुने निर्माण टिमले जानकारी गराएको छ ।