धनगढी- सुदूरपश्चिम प्रदेशसभाको मंगलबारको बैठकले प्रदेशसभाको सचिव र सचिवालय सम्बन्धमा व्यवस्था गर्न बनेको विधेयक २०७५ पारित गरेको छ । विधेयक पारित भएसँगै प्रदेशसभाको काम कारवाही सञ्चालन तथा व्यवस्थापन गर्न सहज हुने भएको छ ।

बैठकमा आन्तरिक मामिला तथा कानूनमन्त्री प्रकाशबहादुर शाहले उक्त विधेयक पारित गरियोस् भनी प्रस्ताव प्रस्तुत गरेका थिए । यसअघि उक्त विधेयकमाथि भएको छलफलमा प्रदेशसभा सदस्य महेशदत्त जोशी, पूर्णा जोशी र लालबहादुर सोडारीले धारणा राखेका थिए ।

यसैगरी बैठकले ‘सुदूरपश्चिम प्रदेशको प्रदेशसभा (पहिलो संशोधन) नियमावली २०७५’ पनि पारित गरेको छ । बैठकमा प्रदेशसभा नियमावली २०७४ को संशोधन मस्यौदा समितिका संयोजक वीरमान चौधरीले उक्त नियमावलीलाई पारित गरियोस् भनी प्रस्ताव प्रस्तुत गरेका थिए । उक्त नियमावली माथि भएको छलफलमा डिल्लीराज पन्त र बलदेव रेग्मीले भाग लिएका थिए ।

यसअघि उक्त नियमावली संशोधन मस्यौदा समितिको प्रतिवेदनउपर नेपाली काङ्ग्रेसका प्रदेशसभा सदस्य श्यामलाल रानाथारुले प्रस्ताव गरेको संशोधन प्रस्तावलाई बैठकले ध्वनि मतले अस्वीकृत गरेको थियो ।

नियमावलीका विभिन्न छ वटा दफामा संशोधन गरिएको छ । बैठकमा आन्तरिक मामिला तथा कानूनमन्त्री शाहले प्रदेश विपद् जोखिम न्यूनीकरण तथा व्यवस्थापनसम्बन्धी विधेयक २०७५ मा टेबुल गरे। अर्को बैठक यही बुधबार दिउँसो २ बजे बस्नेछ ।