काठमाडौँ–  उपराष्ट्रपति निवासमा प्रचण्डसँग गोप्य भेटवार्ता गरेको विषय सार्वजनिक भएलगत्तै पूर्वप्रधानमन्त्री डा. बाबुराम भट्टराईले त्यसबारे मुख खोलेका छन् ।

जनता समाजवादी पार्टीका नेतासमेत रहेका भट्टराईले प्रतिगमनविरुद्ध संयुक्त जनआन्दोलन निर्माण गर्ने प्रयासस्वरुप आफूले राजनीति भेटघाट गरेको बताएका हुन्।

शुक्रबार अबेर ट्वीट गर्दै भट्टराईले आफूले पूर्वप्रधानमन्त्री तथा दलका नेताहरु शेरबहादुर देउवा, माधवकुमार नेपाल, पुष्पकमल दाहाल ‘प्रचण्ड’लगायतका नेताहरुसँग भेटघाट गरेको जनाएका हुन् । यस्ता भेटलाई निरन्तरता दिने पनि उनले बताएका छन् ।

‘अहिले प्रत्येक जिम्मेवार नागरिक आफ्नो र पार्टीको स्वार्थभन्दा माथि उठ्ने बेला आएको छ,’ उनले ट्वीटमा भनेका छन्,’यसै क्रममा मैले ओली प्रतिगमनविरूद्ध संयुक्त जनआन्दोलन निर्माण गर्ने प्रयास स्वरूप पूर्वप्रम र दलका नेताहरू शेरबहादुर देउवा, माधव नेपाल, प्रचण्ड लगायत अन्य नेताहरूसंग भेटघाट गरेको हुँ। गर्दैरहनेछु!’

उनले यो ट्वीट गरेको दुई घण्टापछि फेरि अर्को ट्वीट गर्दै संयुक्त आन्दोलनको अपिल पनि गरेका छन् ।