काठमाडौं– नेत्रबिक्रम चन्द (विप्लव) नेतृत्वको नेकपाका पोलिट्ब्यूरो सदस्य तथा मध्यकमाण्ड इञ्चार्ज हेमन्तप्रकाश वली पुर्पक्षका लागि जेल चलान भएका छन् ।

ललितपुर जिल्ला अदालतले ओलीसहित विप्लव समूहका ६ जनालाई पुर्पक्षका लागि जेल चलाउन गरेको हो ।

१ जनाको मृत्यु र ३ जना घाइते हुने गरी ललितपुरको नख्खुस्थित एनसेल कार्यालयमा भएको बम विस्फोटको मुद्दाको पुर्पक्षका लागि अदालतले वलीसहित ६ जनालाई थुनामा पठाउने आदेश जारी गरेको हो ।

जिल्ला अदालतको आदेशानुसार ६ जनालाई नख्खु कारागार चलान गरिएको महानगरीय प्रहरी परिसर ललितपुरले जानकारी दियो ।

पुर्पक्षका लागि थुनामा पठाइएका अन्यमा जम्ली भनिने वीरबहादुर कठायत, रामकृष्ण खतिवडा, ईश्वर दमाइ, दिकेन्द्र राई र शिव धिमाल छन् ।