काठमाडौँ– राष्ट्रिय महिला लिगका लासिग वालिङ नगरपालिकाले क्यामरुनका चार खेलाडी टोलीमा अनुबन्ध गरेको छ । चारै खेलाडी बिहीबार बेलुकी काठमाडौँ आइपुगेका छन् ।

नेपालका सुगन कुमार तन्डुलकारले उनीहरुलाई नेपाल ल्याएका हुन् । क्यामरुनको यु–२० खेलिसकेका खेलाडीहरु नेपाल आएको तन्डुलकार बताउँछन् । जसमा मेथो एलेदिइ रुथ, केओमेग्ने डिजोमो भेनेस्सा नाइले, डिजोउब्बी सेलिने डायने, टोउटा ओर्मेला एभान्के आएका छन् ।

नेपाली लिग खेल्न पहिलो पटक अफ्रिकन मुलुकका महिला खेलाडी काठमाडौँ आएका हुन् । यसअघि शहीद स्मारक ए डिभिजन लिगका लागि विभिन्न अफ्रिकन मुलुकबाट पुरुष खेलाडीमात्रै आउने गर्थे । तर, जारी महिला लिगमा एक टोलीले चार जनासम्म विदेशी खेलाडी राख्न पाउने प्रावधान अनुरुप उनीहरुलाई वालिङले अनुबन्ध गरेको हो ।

बिहीबारै वालिङले लिगमा आफ्नो पहिलो खेल विराटनगर महानगरपालिकासँग १–१ गोल बराबरी खेलेको छ । वालिङले आफ्नो दोस्रो खेल त्रिभुवन आर्मी क्लबसँग खेल्नेछ । जसमा विदेशी खेलाडी पनि हुनेछन् ।

खेलाडीको कोरोना परीक्षण गरिएको र रिपोर्ट नेगेटिभ आइसकेको छ ।