काठमाडौँ– नेपाली कांग्रेसका प्रवक्ता विश्वप्रकाश शर्माले  प्रधानमन्त्री ओलीलाई अदालततिर फर्केर दबाबको भाषा नबोल्न आग्रह गरेका छन ।

नेपाली कांग्रेस मध्यपुर थिमि नगर कार्य समितिले प्रतिनिधिसभा विघटनको असंवैधानिक र अलोकतान्त्रिक कदमविरुद्ध आयोजना गरेको विरोधसभामालाई सम्बोधन गर्दै उनले न्यायाधीशलाई पार्टीको पोलिटव्यूरो सदस्य नठान्न समेत ओलीलाई चेतावनी दिए ।

‘संसद् विघटनको कदम असंवैधानिक, अलोकतान्त्रिक र सर्वसत्तावादी छ। त्यसैले प्रधानमन्त्रीजी सर्वोच्च अदालततर्फ फर्केर दबाबको भाषा नबोल्नुस्,’ उनले भने ।

उनले सर्वोच्च अदालतको फैसला स्वीकार्न काँग्रेस तयार भएको बताए। तर आफ्ना कदमका विषयमा प्रधानमन्त्रीले जुहारी खेल्ने नहुने उनको भनाइ थियो।

उनले कम्युनिस्ट सरकारले भ्रष्टाचारलाई संस्थागत गर्ने बाहेकका काम नगरेको आरोप लगाए ।

उनले भने, ‘कम्युनिस्ट सरकार भ्रष्टाचारलाई संस्थागत गर्ने सरकार भएको पुष्टि भइसकेको छ। यो सरकारले भ्रष्टाचार नियन्त्रणको आश्वासमा मात्रै बाँडिरहेको छ ।’

अदालतले संसद विघटनको निर्णय सदर वा बदर गरेपनि ओलीको यात्रा बालकोट (ओलीको निजी निवास) हुने उनले दाबी गरे ।