काठमाडौं– नेपाल मेडिकल काउन्सिलले लिने विशेषज्ञ चिकित्सकको विशेष परीक्षा आगामी फागुन १८ गते हुने भएको छ ।

विभिन्न मेडिकल कलेजबाट एमडी, एमएस् र एमडीएस्को ३ वर्षे अध्ययन पूरा गरी विशेषज्ञता हासिल गरेका चिकित्सकलाई विशेष परीक्षाको लागि आवेदन खुल्ला गरिएको हो ।

काउन्सिलले सूचना जारी गर्दै विशेषज्ञता हासिल गरेका चिकित्सकले परीक्षामा सहभागिता जनाउन सक्ने र त्यसका लागि आगामि फागुन ५ गतेभित्रमा फारम र परीक्षा शूल्क बुझाउनुपर्ने बताएको छ ।

विशेषज्ञ चिकित्सकको विशेष परीक्षामा सहभागि हुन अनलाइन फारम भर्न सकिने छ । नेपालमा चिकित्सा अभ्यासका लागि अध्ययन पुरा गरेपछि नेपाल मेडिकल काउन्सिलले लिने विशेष परीक्षा पास गरेपछि मात्रै अनुमति पाउँछन् ।

काउन्सिलले हरेक वर्ष ३ पटक विशेषज्ञ चिकित्सकको विशेष परीक्षा लिने गरेको छ ।