काठमाडौं – जेठ ३ गतेबाट प्रदर्शनमा आउने फिल्म ‘वीर विक्रम २’ का एकसाथ ७ पोस्टर सार्वजनिक गरिएको छ । निर्माण टिमले सामाजिक सञ्जाल फेसबूकमार्फत फिल्मका पोस्टर सार्वजनिक गर्‍यो ।

सार्वजनिक गरिएको पोस्टरमा फिल्मका मुख्य तीन अभिनेता पल शाह, वर्षा शिवाकोटी र नाजिर हुसेनलाई देख्न सकिन्छ । यस्तै पोस्टरमा कलाकार बुद्धि तामाङलाई पनि राखिएको छ । पोस्टरमा तीन कलाकारले वर्षालाई हेरेको देख्न सकिन्छ । केही पोस्टरमा भने वर्षा र पलको चारित्रिक प्रेमलाई झल्काएको देखाइएको छ ।

मिलन चाम्सको लेखन तथा निर्देशन रहेको यो फिल्ममा अर्पण सापकोटा सह–निर्माता छन् । प्रदीप भारद्वाजले स्क्रिप्ट लेखेको यो फिल्ममा वनिष शाहको सम्पादन, सुदीप बरालको डीओपी, नवराज उप्रेतीको क्यामेरा छ । यस्तै फिल्ममा देशभक्त खनाल, विनिषा भण्डारी, विनोद सुवेदी, मनिष लिम्बु लगायतका कलाकारको पनि अभिनय देख्न सकिनेछ ।

फिल्मले यसअघि सार्वजनिक गरेको रिमेक गीत ‘पिरतीको मीठो तिर्सना’ को राम्रै चर्चा छ ।