काठमाडौं – कोरोना भाइरसको महामारीले नेपाली फिल्म क्षेत्र लामो समय थला पर्‍यो । यसै पनि वर्षमा केही फिल्मले मात्र नाफा कमाउने नेपालको फिल्म क्षेत्र कोरोना कहरपछि लगभग शून्य भयो ।

स्थिति सामान्य हुन थालेसँगै अब भने फिल्म मेकरले नयाँ फिल्म निर्माणको घोषणा गरेका छन् । यद्यपि रिलिज हुन बाँकी पुराना फिल्म भने अझै पनि रिलिज गरिने तयारी थालिएको छैन ।

भोलिदेखि भने नेपालका हलमा दुई नयाँ फिल्म रिलिज गरिने भएको छ । नेपालका फिल्म हलमा दक्षिण भारतीय फिल्म ‘मास्टर’ रिलिज हुँदैछ ।

यो फिल्मले रिलिजअघि राम्रो प्रतिक्रिया कमाएको छ । साउथका दुई सुपरस्टार विजय र विजय सेतुपतीको शीर्ष भूमिका रहेकाले पनि फिल्म प्रतीक्षित बनेको छ ।

नेपालमा पनि यो फिल्मले धेरथोर दर्शक बटुल्ने आँकलन गरिएको छ ।

यस्तै भोलिदेखि नेपालमा ‘एउटा यस्तो प्रेम कहानी’ पनि रिलिज हुँदैछ । यो फिल्ममा अभिनेता शिव श्रेष्ठ छोरा शक्ति श्रेष्ठ र करिश्मा मानन्धरकी छोरी कविता मानन्धरको अभिनय रहेको छ । मंगलबार सेन्सर पास भएको यो फिल्मले पीजी सर्टिफिकेट पाएको छ ।

शिव श्रेष्ठको प्रस्तुतिमा निर्माण भएको यो फिल्ममा प्रियंका कार्की, आयुष्मान देशराज जोशी, वर्षा राउत, सञ्जोग कोइराला लगायतका कलाकारको पनि अभिनय छ ।

फिल्मलाई दिपेश सापकोटाले निर्देशन गरेका हुन् ।