काठमाडौँ– पुस २१ गते गोरखा दरबारबाट शुरु भएको गोरखा–काठमाडौँ एकीकरण मार्ग पदयात्राको टोली भोलि (आइतबार) काठमाण्डौ आइपुग्ने भएको छ ।

पृथ्वीनारायण शाह हिँडेको बाटो हुँदै गोरखाबाट हिँडेको नेपाली सेनाको टोली आइतबार बेलुकी ५ बजे हनुमान ढोका दरबार आइपुग्ने नेपाली सेनाले जनाएको छ ।

नुवाकोटको ककनीबाट हिँडेको टोली पाँचमाने हुँदै बिहान तीनपिप्ले आइपुग्नेछ । त्यहाँ पालिका तथा स्थानीयवासीद्वारा पञ्चेबाजा एवं झांकीसहित स्वागत गर्ने कार्यक्रम रहेको छ ।

त्यसपछि नेपाली सेनाको टोली पृथ्वीनारायण विद्यालय बालाजू बाइपास, सोह्रखुट्टे, नरदेवी हुँदै हनुमानढोका दरबार पुग्ने कार्यक्रम रहेको छ ।

हनुमानढोका दरबारमा पदयात्रा टोलीलाई पालिकाका प्रतिनिधि, गुठी, क्लबहरु, सर्वसाधारण लगायतले स्वागत गर्नेछन् ।

साँझ श्री शम्शेरदल गणले हनुमानढोकामा तैनाथ श्री शार्दुलजंङ्ग गुल्मलाई सैनिक ड्रिलको प्रदर्शनसहित राष्ट्रिय झण्डा, टर्च तथा पृथ्वीनारायण शाहले बनाएका सेनाका ५ वटा कम्पनीका झण्डा हस्तान्तरण गर्ने कार्यक्रम रहेको नेपाली सेनाले जनाएको छ ।