काठमाडौँ– राष्ट्रिय फुटबल टोलीको बन्द प्रशिक्षणबाट बिमल घर्ति मगरसहित १४ खेलाडी बाहिरिएका छन्।

अखिल नेपाल फुटबल संघ (एन्फा) ले शुक्रबार प्रारम्भिक चरणको बन्द प्रशिक्षणमा रहेका ५८ खेलाडीबाट १४ खेलाडीलाई बिदा गरेको हो।

राष्ट्रिय टिमको कार्यवाहक प्रशिक्षक बाल गोपाल महर्जनले करिब १ महिनाको प्रशिक्षणपछि ५८ खेलाडीबाट घटाएर ४४ खेलाडी छनोट गरेका हुन् ।

बन्द प्रशिक्षणबाट बाहिरिनेमा विमलसहित सुमन अर्याल, देव लिम्बु, रन्दिप पौडेल, अमित तामाङ, जया गुरुङ, नितिन थापा, रजत तिवारी, दिपेश आले मगर, राजेश परियार, प्रिजन तामाङ, रेजिन सुब्बा, राजिब लोप्चन र विमल राना रहेका छन् ।

लामो समयपछि राष्ट्रिय टिममा परेका फरवार्ड विमल चोटका कारण टिमबाट बाहिरिएका हुन् । उनले प्रशिक्षणको दौरान गम्भीर चोट बोकेका थिए । उनको उपचार कतारमा हुने एन्फाले जनाएको छ ।

यस्तै एन्फाले डिफेन्डर सुमन अर्याल पनि घाइते भएको कारण बाहिरिएका हुन ।

नेपालले फिफा विश्वकप २०२२ तथा एएफसी एसियन कप २०२३ अन्तरगत संयुक्त छनोटका खेल मार्च २५ मा चाइनिज ताइपेइ र ३० मा अस्ट्रेलियासँग काठमाडौंस्थित दशरथ रंगशालामा खेल्नेछ।

यसअघि नेपालले खेलेका ५ खेलमध्ये १ खेलमा जीत हात पारेको छ भने ४ खेलमा हार व्येहोरेको छ।