काठमाडौं– रामेछापको मन्थली विमानस्थलमा तारा एयरको जहाज अवतरणका क्रममा चिप्लिएर चउरमा धस्सिएको छ ।

काठमाडौंबाट लुक्लाका लागि उडेको तारा एयर नाइन एन एकेके कल साइन भएको डोर्नियर विमान खराब मौसमका कारण लुक्लामा अवतरण हुन नसकेपछि मन्थली फर्किएको थियो ।

मन्थलीमा अवतरणका क्रममा जहाजको चक्का विमानस्थलको सुरक्षाका लागि लगाइएको तारजालीमा ठोक्किएको थियो ।

तारजालीमा ठोक्किएपछि अनियन्त्रित भएको जहाज रनवे छाडेर चउरमा गएर धस्सिएको जिल्ला प्रहरी कार्यालय रामेछापका निमित्त प्रमुख, प्रहरी निरीक्षक शेख अदालतले खबरहबलाई जानकारी दिए ।

दुर्घटनामा कुनै मानवीय क्षति नभएको प्रहरी निरीक्षक अदालतले जानकारी दिए । यद्यपि जहाजको चक्कामा भने क्षति पुगेको उनले जानकारी दिए ।

जहाजमा १४ जना यात्रु सवार रहेका जनाइएको छ ।