काठमाडौँ– नेपाल भ्रमणमा रहेको चिनियाँ कम्युनिस्ट पार्टीको अन्तरराष्ट्रिय विभागका उपमन्त्री क्वो ये चौसहितको प्रतिनिधिमण्डलले कांग्रेस सभापति शेरबहादुर देउवासँग भेट गरेको छ।

सभापति शेरबहादुर देउवासँग भेट्न चिनियाँ टोली बुढानिलकण्ठ पुगेको थियो । भेटका क्रममा नेपाल-चीन सम्बन्धका बारेमा छलफल भएको छलफलमा सहभागी परराष्ट्रविद् डाक्टर निदेशभन्द्र भट्टराईले बताए ।

उनले भने,‘भेटका क्रममा दुई देशको सम्बन्धका बारेमा कुराकानी भयो । सरकार रहँदा र बाहिर रहँदा पनि चीनप्रति नेपाली कांग्रेसको समान धारणाको उहाँले प्रशंसा गर्नुभयो ।’

भेटका क्रममा सभापति देउवाले चिनिया कम्युनिस्ट पार्टी स्थापनाको एकसय वर्ष पुगेकोमा बधाई दिएको समेत डाक्टर भट्टराईले बताए ।

उनले भने,‘सभापतिजीले चिनियाँ कम्युनिस्ट पार्टीको सय वर्ष पुगेकोमा शुभकामना दिनुभयो । उहाँहरुले चिनिया कम्युनिस्ट पार्टीको स्थापनाको एकसयवर्ष पुगेको अवसरमा हुने कार्यक्रमका लागि सि चिन पिङको निम्तो पनि दिनुभयो ।’

छलफलका क्रममा कांग्रेस नेता बीपी कोइरालाले नेपाल-चीन सम्बन्ध गाँस्नका लागि आधारशीला खडा गर्न योगदान दिएको विषयमा समेत चर्चा भएको थियो ।