झापा- जंगली हात्तीको बथान गाउँमा प्रवेश गर्दा झापाको कमल–५ टुकुरेका बासिन्दा रातभर त्रसित भएका छन् ।

राती गाउँ पसेका ५/६ ओटा हात्तीलाई सुरक्षा निकायको सहयोगमा धपाईएको वडाअध्यक्ष डम्बर बहादुर निरौलाले जानकारी दिए ।

इलाका प्रहरी कार्यालय दमकबाट साईरनसहितको गाडी रातभरि हात्ती धपाउन कुदाईएको थियो भने सो बस्ती नजिकै रहेको सशस्त्र प्रहरी तालिम केन्द्रबाट एक टोली नै राति हात्ती धपाउन परिचालित भएको उनले बताए ।

हात्ती धपाउने क्रममा ४/५ घरमा क्षती पुर्‍याएको पाईएको र थप विवरण संकलनको क्रममा रहेको वडाअध्यक्ष निरौलाले बताए । सो स्थानमा बारम्बार जंगली हात्तीले दुःख दिने गरेको छ ।

हात्ती गाउँमा पसे पछि सर्वसाधारणहरुले भागेर ज्यान बचाएका छन् । निरौलाका अनुसार एक्कासी उत्तरी चुरे क्षेत्रबाट प्रवेश गरेको हात्तीको समुहले एकाएक घर भत्काएपछि त्यहाँ भागाभाग भएको थियो ।