काठमाडौँ– सत्तारुढ नेकपाका अध्यक्षद्वय केपी शर्मा ओली र पुष्पकमल दाहाल प्रचण्डबीच झण्डै दुई घण्टा छलफल भएको छ ।

शनिबार कार्यकारी अध्यक्ष प्रचण्डलाई भेट्न प्रधानमन्त्रीसमेत रहेका अध्यक्ष ओली दाहाल निवास खुमलटार पुगेका थिए ।

ओली खुमलटार पुगेको केहीसमयपछि उपाध्यक्ष वामदेव गौतम पनि प्रचण्ड निवास खुमलटार पुगेका छन् । तीन नेताबीच खुमलटारमा छलफल सकिएलगत्तै वरिष्ठ नेता माधव कुमार नेपाल पनि पुगेका छन् । त्यसलगत्तै दाहाल-नेपाल र गौतमबीच छलफल चलेको बताइएको छ ।

तीन जनाबीच केहीबेरको छलफलपछि गौतम पनि बाहरिएका छन् । उनी बाहिरिएपछि नेपाल र दाहालबीच छलफल भइरहेको छ । प्रधानमन्त्री ओलीले यसअघिको बैठकमा गौतमलाई प्रधानमन्त्री बनाउने प्रस्ताव गरेपछि शुक्रबारको दाहाल-नेपाल पक्षधरको पेरिसडाँडामा भएको भेलामा गौतम गएका थिएनन् ।

तर, आजको बैठकमा गौतमको सहभागितलाई अर्थपूर्ण रूपमा लिइएको छ । ओलीले आजको बैठकमा पनि सोही प्रस्ताव दोहोर्‍याएकाले दाहालले नेपाललाई पनि छलफलमा बोलाएको हुन सक्ने आकलन गरिएको छ । तर, यसबारे पुष्टि हुन सकेको छैन । दाहाल निकट स्रोतका अनुसार बैठकमा भएका कुराकानीबारे अहिलेसम्म केही खुलाइएको छैन ।

पार्टी विवाद उत्कर्षमा पुगेका बेला खुमलटारमा भएको नेताहरूको यो भेटले निकास दिने अपेक्षा गरिएको छ । दाहाल-नेपाल समूहले भेला तीब्र पारेपछि निकटस्थहरूले समेत ओलीलाई मिलेर जान दबाब दिइरहेका छन् ।

अध्यादेश फिर्ता लिन भएको सहमति कार्यान्वयन नगरेपछि दाहाल-नेपाल समूह ओलीविरूद्ध कठोर कदम चाल्ने रणनीतिमा लागेको छ । यसैको श्रृंखलास्वरूप दाहाल-नेपाल समूहले शुक्रबार पार्टी कार्यालय पेरिसडाँडामा भेला तथा प्रशिक्षणसमेत गरेपछि ओली अझ बढी दबाबमा छन् ।

पार्टी सञ्चालन र सरकार सञ्चालनका विषयबाट सुरू भएको नेकपाको विवाद पछिल्लो समय विभिन्न राजनीतिक नियुक्ति र संवैधानिक परिषदसम्बन्धी अध्यादेश प्रकरणबाट झनै चर्किएको छ ।