एजेन्सी- इंग्लिस प्रिमियर लिग फुटबलमा म्यान्चेष्टर युनाईटेड विजयी भएको छ ।

बिहीबार राति सेफिल्डको घरेलु मैदानमा भएको खेलमा म्यान्चेष्टर युनाईटेडले सेफिल्ड युनाईटेडलाई ३–२ गोलअन्तरले पराजित गरेको हो ।

उसको जितमा मार्कुस रासफार्डले दुई गोल गर्दै पाहुना टोलीको जितको आधार तयार गरे ।

पूर्वक्लबविरुद्ध उत्रिएका ड्यान हेन्डरसनले सेफिल्डलाई सुरुवातमै अग्रताको मौका दिए । प्राप्त बल क्लियर गर्न नसक्दा डेविड म्याकगोल्डरिकले घरेलु टोलीलाई खेलको पाँचौ मिनेटमै अग्रता दिलाएका थिए । लगत्तै सेफिल्डका जोन फ्लिकले सुन्दर अवसर गुमाए ।

२६औँ मिनेटमा मार्कुस रासफार्डको गोलमार्फत म्यान यु खेलमा फर्कियो । एन्थोनी मार्टियलले गोल गर्दै म्यान युलाई २–१ को अग्रता दिलाए । उनले गोलका लागि पाउल पोग्बाको पासलाई सदुपयोग गरे ।

मार्टियलकै पासमा रासफार्डले ब्यक्तिगत दोस्रो गोल गर्दै म्यान युलाई ३–१ ले अघि बढाए । खेल सकिन ३ मिनेट बाँकी छदाँ घरेलु टोलीका म्याकगोल्डरिकले ब्यक्तिगत दोस्रो गोल गर्दै हार अन्तर कम गरेका थिए ।

जित सहित म्यानचेष्टर युनाइटेड तालिकाको छैठौँ स्थानमा उक्लिएको छ । सेफिल्ड १ अंकसहित तालिकाको पुछारमै रह्यो ।