झापा– झापाको दमक–१ स्थित दमक अस्पतालमा २ महिना अघि भएको आगलागीबाट ६० लाख भन्दा बढिको क्षति भएको ठहर भएको छ ।

बिहीबार नगरपालिकाले गठन गरेको छानविन समितिले अस्पतालमा भएको क्षतीको विवरण सार्वजनिक गरेको हो ।
गत कार्तिक २९ गते दिउँसो करिव साढे २ बजे लागेको आगलागीबाट ६० लाख ८६ हजार २ सय २४ रुपैँयाका औषधि, उपकरण तथा स्वास्थ्य सम्बन्धी सामाग्रीमा क्षति भएको समितिले जनाएको छ ।

क्षति भएका मध्ये ३२ लाख ७ हजार ७ सय ५५ रुपैँयाका सामग्री तथा उपकरणहरु पुनः प्रयोग गर्ने मिल्ने र बाँकी २८ लाख ७८ हजार ४ सय ६९ रुपैँया बराबरका स्वास्थ्य सामग्रीहरु पूर्ण रुपमा जलेका छन् । यी सामग्रीहरु निक्रिय गराईने अस्पताल व्यवस्थापन समिति अध्यक्ष तथा नगर उप प्रमुख गीता अधिकारीले जानकारी दिइन ।

आगलागीपछि नगरपालिकामार्फत अस्पतालको व्यवस्थापन समितिमा रहेका बाहेकका ७ जना पदाधिकारीसहितको छानबिन समिति गठन भएको थियो । वडा नं १० का वडाध्यक्ष बोधराज न्यौपानेको संयोजकत्वमा गठित समितिले बिद्युत सर्ट भएर आगोलागी भएको र अव तत्काल सुधार गर्न ३ शीर्षकमा सुझाव समेत अस्पताल व्यवस्थापन समितिलाई दिएको छ ।

२०७३ सालमा हेल्थ पोष्टबाट स्तरउन्नति भएर दमक अस्पताल बनेको यो अस्पताल जिल्ला स्तरको एक मात्र सरकारी अस्पताल हो । हाल यहाँ १५ शय्यासहित २४ सै घण्टा प्रसुतिसहित विभिन्न आकस्मिक सेवाहरुको प्रवाह भईरहेको छ ।