एजेन्सी– इंग्लिस प्रिमियर लिगमा वेस्ट ह्यामले पुनरागमन जित निकालेको छ ।

एक गोलले पछि परेको अवस्थामा वेस्ट ह्यामले लिड्स युनाइटेडलाई उसकै मैदानमा २–१ ले हराउँदै पुनरागमन जित निकालेको हो ।

इललान्ड रोड लिड्समा शुक्रबार राति भएको खेलमा घरेलु टोलीले खेलको छैठौँ मिनेटमा पेनाल्टी गोलबाट अग्रता लिएको थियो ।

२५औं मिनेटमा टोमास सौसेकले जारोड बोवेनको पासमा गोल गर्दै वेस्ट ह्यामलाई १–१ गोलको बराबरीमा ल्याए ।

८०औं मिनेटमा एन्जेलो ओग्वोन्नाले आरोन क्रेसवेलको पासमा गोल गर्दै वेस्ट ह्यामलाई २–१ को अग्रता दिलाए । सोही गोल नै निर्णायक पनि बन्यो ।

यो जितसँगै वेस्ट ह्याम १२ खेलबाट २० अंक जोडेर लिगको पाँचौ स्थानमा उक्लिएको छ । पराजित लिड्स १४ अंकसहित १४औँ स्थानमा रहेको छ ।