काठमाडौं–छोराछोरी पढाउन शहर पसेका जाजरकोट कुसे गाउँपालिका ३ का कर्णलाल जैसी यतिबेला काठमाडौं छाडेर गाउँ फर्कने सोचमा छन् । ३ छोराछोरी पढाउने योजना त्यागेर उनी वर्ष दिन नपुग्दै गाउँ फर्कने निष्कर्षमा पुगेको कान्तिपुर दैनिकमा खबर छ । सरकारले वैशाख २ देखि १६ गतेसम्मलाई विद्यार्थी भर्ना अभियान घोषणा गरेको छ ।

प्रधानमन्त्रीदेखि मन्त्री, सांसद, जनप्रतिनिधि, शिक्षासेवीले अभिभावकत्व ग्रहण गरेर असहाय बालबालिकालाई गत वर्षदेखि नै विद्यालयमा भर्ना गराएका छन् । तर पाटन उपनामले परिचित पूर्वलडाकु जैसीको न छोराछोरी विद्यालय भर्ना गराउने सामर्थ्य छ, न त अभिभावकत्व दिइदिने कुनै भरपर्दो सहयोगी भेटेका छन् । त्यसैले उनी शैक्षिक सत्रको सुरुदेखि सिंहदरबारका विभिन्न मन्त्रालय धाइरहेका छन् ।

यस्तै नेकपाका महासचिव विष्णु पौडेलले बालुवाटारको जग्गबारे छानबिन गर्न माग गरेका छन् । उनले सम्बन्धित कार्यालयले प्रचलित कानुन अनुसार किन्न मिल्लने यकिन गरेकैले आफूले बालुवाटारमा छोराका नाममा आठ आना जग्गा खरिद गरेको उल्लेख गर्दै यसमा छानबिन गर्न माग गरेका हुन् ।

त्यस्तै पत्रिकाले चाउचाउ र खुर्सानीको भर शीर्षकको समाचारमा आठौ राष्ट्रिय खेलकुदमा खेलाडीलाई समस्या भएको खबर पनि प्राथमिकताका साथ छापेको छ ।

संघीय संसद्‌मा गैरकानुनी रूपमा ३ करोड ६९ लाख प्रोत्साहन भत्ता शीर्षकको समाचारमा संघीय संसदका महासचिवदेखि सचिवालयका कर्मचारीले प्रोत्साहन भत्ताबापत गैरकानुनी रूपमा ३ करोड ६९ लाख १७ हजार रुपैयाँ लिएको पाइएको छ । महालेखा परीक्षकको कार्यालयले २०७४/७५ को प्रतिवेदनमा संसदका महासचिव र कर्मचारीले २०७४ माघदेखि असार मसान्तसम्म गैरकानुनी रूपमा उक्त प्रोत्साहन भत्ता बुझेको उल्लेख गरेको छ ।