काठमाडौँ– प्रिमियर लिग क्लब म्यान्चेस्टर युनाइटेड च्याम्पियन्स लिग फुटबलको समूह चरणबाटै बाहिरिएको छ । मंगलबार राति भएको खेलमा जर्मन क्लब आरबी लाइपजिगसँग ३–२ गोलले पराजित हुँदै युनाइटेड समूह चरण बाटै बाहिरिएको हो ।

घरेलु मैदानमा लाइपजिगलाई जित दिलाउन एन्गेलिनो, अम्डु हइडारा र जस्टिन क्लुभेर्टले एक–एक गोल गरे । युनाइटेडका लागि ब्रुनो फर्नान्डेज र पाउल पोग्बाले एक–एक गोल फर्काए ।

खेलको दोस्रो मिनेटमा एन्गेलिनोको गोलबाट घरेलु टोलीले अग्रता बनाएको थियो । १३ औं मिनेटमा हइडाराले गोल गर्दै लाइपजिगको अग्रता दोब्बर पारे ।

६९ औं मिनेटमा जस्टिनले गोल गर्दै लाइपजिगलाई जिततर्फ अगाडि बढाए । ८० औं मिनेटमा फर्नान्डेजले पेनाल्टीमार्फत गोल गर्दै टिमलाई केही राहत दिलाए । त्यसको दुई मिनेट पछि पोग्बाले गोल गरे पनि टिमलाई जित दिलाउन सकेनन् ।

जितसँगै लाइपजिग समूह एचको विजेता बनेको छ । पराजित युनाइटेड समूह चरणबाटै बाहिरिएको छ ।