एजेन्सी- इरानका वरिष्ठ आणविक वैज्ञानिकको हत्यामा ‘आर्टिफिसियल इन्टेलिजेन्स’सहितको स्याटलाइट नियन्त्रित मेसिनगन प्रयोग भएको दाबी गरिएको छ ।

नोभेम्बर २७ मा तेहरान शहरभन्दा बाहिर मोहसेन फक्रिजादे सवार गाडीमा गोली प्रहार गरेर उनलाई मारिएको थियो।

‘आर्टिफिसियल इन्टेलिजेन्स’सहितको स्याटलाइट नियन्त्रित मेसिनगन एउटा पीकअप गाडीमा राखेर फक्रिजादेको हत्या गरिएको इरानको रेभुलस्नरी गार्ड्सका सहायक रथी अलि फदवीले दाबी गरेका छन् ।

छेवैमा रहेकी वैज्ञानिककी श्रीमतीलाई कुनै असर नगरीकन ती वैज्ञानिकको अनुहार पहिचान गरेर तेह्रवटा गोली हानिनुले पनि त्यसको पुष्टि गर्ने फदवीले बताएका छन् ।

इरानका सर्वोच्च नेता अयातोल्हा अली खामेनेईले उक्त हत्याको बदला लिइने चेतावनी दिएका छन् ।

इरानले घटनामा इजरायलको संलग्नता रहेको आरोप लगाउँदै आएको छ ।