पर्सा– नेपाल कम्युनिष्ट पार्टी (नेकपा) पर्सा विन्दवासीनी गाउँ कमिटी सचिव मुकेश चौरसियाको हत्या आरोपमा पक्राउ परेका ५ अभियुक्तमध्ये २ जनालाई पुर्पक्षका लागि जेल चलान गरिएको छ।

२ जनालाई भने जनही २/२ लाख नगद धरौटीमा छोडिएको छ। अर्का १७ वर्षीय बालक सवेद्दिन राउत गद्दीलाई भने घटनामा सम्लग्न भएको पुष्टि नपुगेपछि सामान्य तारेखमा आफन्तको जिम्मा लगाइएको पर्सा जिल्ला अदालतले जनाएको हो।

पुर्पक्षका लागि जेल चलान हुनेहरुमा स्थानीय अश्वेस्वर भन्ने अखलेश चौरसिया, उत्तम भनिने निरन्जन तिवारी रहेको पर्सा जिल्ला अदालतका श्रेस्तेदार कृष्ण प्रसाद अधिकारीले जानकारी दिए ।

हनिफ मिया जोलाहा र देवा सहनी मलाहा भने जनही दुई/दुई लाख धरौटीमा रिहा भएका छन् ।

पर्सा जिल्ला न्यायधीश नारायण प्रसाद शर्माको इजलासमा बुधबार सकिएको थुनछेक बहसपछि मुलुकी फौजदारी कार्यविधि संहिता २०७४ को दफा ६७ बमोजिम चौरसिया र तिवारीलाई पुर्पक्षका लागि जेल चलान गर्ने आदेश भएको हो।

पर्साको विन्दवासीनी गाउँपालिकामा गएको कार्तिक ६ गते नेकपाको गाउँ कमिटीको शपथ कार्यक्रममा पार्टीकै कार्यकर्ताबीच झडप हुँदा गाउँ कमिटीका सचिव मुकेश चौरसियाको उपचारका क्रममा घटनाको भोलिपल्ट निधन भएको थियो।