डडेल्धुरा– नेपाललाई राजतन्त्रसहित हिन्दू राष्ट्र घोषणा गर्नुपर्ने मागराख्दै डडेल्धुरा सदरमुकाममा आज राजावादीहरुले प्रदर्शन गरेका छन् ।

राष्ट्रवादी युवा संगठन तथा राष्ट्रवादी नागरिक समाज डडेल्धुराले सदरमुकाममा र्‍यालीसहित प्रदर्शन गरेको हो । सदरमुकामस्थित बसपार्क, तुफानडाँडा, किर्तिपुर, पोखरा बजार र टुडिँखेल हुँदै गणतन्त्र बिरोधी चर्का नारावाजीकासाथ नगर परिक्रमा गरेको र्‍याली पुनः बसपार्कमा फर्केर कोणसभामा परिणत भएको थियो ।

युवाहरूले नेपालको झण्डा लिएर मोटर साइकल तथा गाडीमा राजतन्त्रको पक्षमा नाराबाजी गरेका थिए । र्‍यालीका लागि सुरक्षा व्यवस्था पनि कडा पारिएको थियो ।

पछिल्लो समयमा नेताहरूको काम कारबाही प्रति स्थानीय जनताहरूको वितृष्णा बढ्दै गएकोले राजतन्त्र पुर्नबहालीको मागगर्दै प्रदर्शन गरिएको राष्ट्रवादी युवा संगठन तथा राष्ट्रवादी नागरिक समाज डडेल्धुराका कार्यक्रम संयोजक निरज जोशीले बताए ।

कार्यक्रम संयोजक जोशीले कोरोना महामारीको सङ्क्रमणको जोखिमलाई मध्येनजरगर्दै र्‍यालीमा सहभागीहरुलाई मास्क र स्यानेटाइजरको प्रयोग गरेर स्वास्थ्य सजगता अपनाउदै र्‍याली प्रदर्शन गरिएको जानकारी दिए ।

र्‍यालीमा नेकपा, काँग्रेस लगायतका राजनीतिक दलका नेता कायकर्ताहरूको समेत सहभागिता रहेको थियो ।