काठमाडौं– अघिल्लो वर्ष वि.स.२०७५ मा मुलुकमा भएका विभिन्न ४ हजार २ सय ८२ विपद्का घटनामा ४ सय ५४ जनाले ज्यान गुमाएका छन् ।
गृहमन्त्रालय अन्तर्गतको विपद् जोखिम न्यूनीकरण केन्द्रले सार्वजनिक गरेको तथ्यांक अनुसार विभिन्न विपद्बाट ११ हजार ५ सय ३३ परिवार प्रभावित भएका छन् । गत वर्ष चट्याङबाट मात्रै ६८ जनाको ज्यान गएको तथ्यांकमा उल्लेख छ ।

बारा जिल्लामा अघिल्लो वर्ष सबै विपद्का घटनाबाट सबैभन्दा धेरैको ज्यान गएको जनाइएको छ । त्यस्तै, अघिल्लो वर्ष वर्षभरीमा सबैभन्दा धेरै विपद्को घटना चैत महिनामा भएको उल्लेख छ । यसअनुसार चैत महिनामा भएका विभिन्न ४ सय ८६ विपद्का घटनामा ६६ जनाको ज्यान गुमाएका थिए ।

सबैभन्दा कम विपद्का घटना भएको असोज महिनामा भने १ सय ८७ घटनामा २८ जनाले ज्यान गुमाए ।  अघिल्लो वर्ष प्रदेश नम्बर १ मा सबैभन्दा धेरै १०३४ विपद्का घटनामा ७९ जनाको ज्यान गएको छ । त्यस्तै, सबैभन्दा कम विपद्का घटना भएको कर्णाली प्रदेशमा २१४ घटनामा ४१ जनाले ज्यान गुमाएका छन् ।