इस्लामावाद- २००८ को नोभेम्बर २६ मा भएको मुम्बई आक्रमणमा संलग्‍न भएको आतंकवादी समूह लस्कर-ई-तैयबा (एलईटी) लाई कारबाही गर्न पाकिस्तानी प्रधानमन्त्री इमरान खानलाई आग्रह गरिएको छ ।

युरोपियन संसद्‌का सदस्यहरुले पाकिस्तानका प्रधानमन्त्री खानलाई तत्काल आतंकवादी समूह एलईटीलाई कारबाही गर्न आग्रह गरेका हुन् । युरोपियन संसदका सदस्य रिसजार्ड जारनेकी र फुलभियो मार्तुसेलोले पाकिस्तानलाई आतंकवादी समूहलाई कारबाही गर्न आग्रह गरेका हुन् ।

उनीहरुलाई पाकिस्तानले आतंकवादी समूहलाई संरक्षण गरेको संकेत गर्दै मुम्बई आक्रमणका पीडितहरुलाई न्याय दिन ढिलाइ नगर्नसमेत आग्रह गरेका छन् ।

सन् २००८ मा पाकिस्तानमा रहेको आतंकवादी समूह एलईटीले मुम्बईका विभिन्‍न स्थानहरुमा आक्रमण गरेको थियो । उक्त आक्रमणमा १७७ जनाभन्दा बढीको मृत्यु भएको थियो भने ३०० भन्दा बढी घाइते भएका थिए ।

युरोपियन संसदका लागि इटालीयन प्रतिनिधि मार्तुसेलो र पोल्यान्डका प्रतिनिधि जारनेकीले पाकिस्तानी प्रधानमन्त्री खानलाई पत्र पठाउँदै २६ नोभेम्बर २००८ को आक्रमणका पीडितहरुलाई न्याय दिन आग्रह गरेका हुन् ।

उनीहरुले पाकिस्तानले हालसम्म उनीहरुलाई कारबाही गर्न नसकेको भन्दै निन्दासमेत गरेका छन् । यस्ता किसिमका नरसंहारहरु आगामी दिनमा हुन नदिनका लागि समेत सचेत गराउँदै पीडितहरुलाई न्याय दिन आंतकवादीहरुलाई कारबाही गर्नुपर्ने बताइएको छ ।