काठमाडौँ- उत्तर कोरियाली शासक किम जोङ उनका भतिजा किम हान सोललाई अमेरिकाको जासुसी एजेन्सी सीआईएको नियन्त्रणमा लिएको छ ।

बेलायती अखबार द सनका अनुसार किम हान सोललाई अमेरिकी जासुसी एजेन्सी सीआईएले आफ्नो सुरक्षा घेरामा राखेको हो ।

उनलाई के कति कारणले सीआइएले नियन्त्रणमा  लियो भन्ने केही खुलाइएको छैन । सीआईएले समेत यसबारे केही खुलाएको छैन ।

किम हान सोल किम जोंग उनका दाजु किम जोंग नामका छोरा हुन् । किम जोंग नामको २०१७ मा हत्या गरिएको थियो । किम जोंग नामको हत्या किम जोंग उनले नै गराएको विश्वास गरिन्छ ।

किम हान सोललाई उत्तर कोरियाको वास्तविक उत्तराधिकारी मानिन्छ । हान सोल यसअघिका उत्तर कोरियाली शासक (किम जोंग उनका पिता) किम जोंग इलका जेठा छोराका छोरा हुन् ।

उत्तर कोरियाको सरकारविरोधी भूमिगत आन्दोलनमा फ्रि जोसनले हान सोलका पिताको हत्या भएपछि उनी भागेका थिए ।

२०१७ मा किम जोंग नामको हत्यापछि हान सोलको मकाउस्थित घरको सुरक्षा गर्ने पुलिस गायब भएपछि हान सोलले फ्रि जोसनको सहयोग मागेको बताइन्छ ।

हान सोललाई त्यो घटनाको ३ महिनापछि एक युट्युब भिडियोमा देखिएको थियो । त्यसयता उनी बेपत्ता भएको बताइदै आएको छ ।

२५ वर्षका हान सोलले अत्यन्तै विलासी जीवन बिताउने गरेको विश्वास गरिन्छ । पिताको हत्यापछि हान सोल नेदरल्याण्डको एम्सटर्डममा शरण लिएर बसेका थिए ।