काठमाडौँ- वीर अस्पतालका स्वास्थ्यकर्मीको आन्दोलन ३१ दिन हुँदा पनि अझै उनीहरूको मागको सुनुवाई भएको छैन ।

कोभिड-१९ मा काम गरेको भत्ता समयमै दिनुपर्ने, यसअघि खाइपाइ आएको सेवा सुविधा कटौती गर्न नहुने, तलब समयमा उपलब्ध गराउनुपर्ने लगायतका माग राख्दै स्वास्थ्यकर्मीहरु ३१ दिनदेखि आन्दोलित छन् । तर, उनीहरूको माग अझै सम्बोधन भएको छैन ।

कोरोना भाइरस संक्रमित बिरामीहरुको उपचारमा अहोरात्र खटिएर काम गरिरहेका चिकित्सकहरुको मनोवल गिराउने काम सरकार गरेको उनीहरुको आरोप छ ।

आफूहरुले पाउँदै आएको सेवा सुविधा कटौती गर्न नपाइने, कोभिड भत्ता समयमा उपलब्ध गराउनुपर्ने लगायतका माग राख्दै कात्तिक २ गतेबाट सुरु भएको आन्दोलन ३१औँ दिनमा पनि जारी रहेको नेपाल चिकित्सक संघ वीर अस्पतालका अध्यक्ष खुबराज आचार्यले बताए ।

आन्दोलनरत स्वास्थ्यकर्मी चिकित्सकहरुले सरकारले तोकेको सेवा सुविधासमेत पदाधिकारीहरुले नदिने गरेको आरोप लगाउँदै आएका छन् ।