काठमाडौँ- नेपाल संवत् अनुसारको नयाँ वर्ष ११४१ आज सुरु भएको छ ।

नयाँ वर्ष ११४१ का अवसरमा आज विविध कार्यक्रम गरिँदैछ । काठमाडौँ उपत्यकासहित नेवार समुदायको बाहुल्य रहेको स्थानमा विशेषरुपमा मनाउने नेपाल संवतमा यो वर्ष खास उल्लास भने छैन ।

यस वर्ष कोरोना संक्रमणको महामारीको त्रासले खास जमघटसहितका कार्यक्रम छैनन् ।

राष्ट्रिय विभूति शङ्खधर साख्वाले विसं ९३७ (इ सं ८८०) मा गरिब नागरिकको ऋणमोचन गरी नेपाल संवतको सुरुवात गरेका थिए ।

नेपाल संवतले पृथ्वीनारायण शाहको शासनकालसम्म राष्ट्रिय संवतका मान्यता पाएको लुम्बिनी बौद्ध विश्वविद्यालयका पूर्वउपकुलपति डाक्टर त्रिरत्न मानन्धरले जानकारी दिए ।

२००७ मा प्रजातन्त्र स्थापनादेखि नै नेपाल संवतलाई राष्ट्रिय मान्यताका लागि अभियान चलाइएको छ ।

२०५६ सालमा साख्वालाई राष्ट्रिय विभूति घोषणा गरिएको थियो ।

विक्रम संवत् २०६५ मा तत्कालीन प्रधानमन्त्री पुष्पकमल दाहाल (प्रचण्ड)ले नेपाल संवतले राष्ट्रिय मान्यता पाउने घोषणा गरेका थिए ।