काठमाडौँ- पश्चिमी वायुको प्रभावले अहिले देशका केही प्रदेशमा हल्का वर्षा र हिमपात भइरहेको जल तथा मौसम पूर्वानुमान महाशाखाले जनाएको छ ।

अहिले सुदूरपश्चिम, कर्णाली, लुम्बिनी, गण्डकी र बागमती प्रदेशमा आंशिक देखि सामान्य बदली भई थोरै स्थानहरुमा वर्षा र हिमपात भईरहेको महाशाखाले जनाएको छ ।

यस्तै प्रदेश नम्बर १ का पहाडी भूभागमा आंशिक बदली भएको छ । बाँकी भू-भागमा भने मौसम सफा रहेको महाशाखाले जनाएको छ ।

आज दिउँसो सुदूरपश्चिम, कर्णाली, लुम्बिनी, गण्डकी र बागमती प्रदेशका केही स्थानमा मेघ गर्जन र चट्याङसहित हल्का वर्षाको सम्भावना रहेको महाशाखाले जनाएको छ ।

उच्च पहाडी तथा हिमाली भूभागका केही स्थानहरूमा भने हल्का देखि मध्यम हिमपातको पूर्वानुमान गरिएको छ ।

राति पनि देशभर आंशिक देखि सामान्य बदली रही सुदूरपश्चिम र कर्णाली प्रदेशको एक दुई स्थानहरु र  गण्डकी, बागमती तथा प्रदेश १ का थोरै स्थानमा हल्का वर्षाको सम्भावना रहेको जनाइएको छ ।