मोरङ-स्वास्थ्य तथा जनसङ्ख्यामन्त्री भानुभक्त ढकालले कोभिड-१९ खोप परीक्षण सफल हुनसाथ नेपालमा आयातका लागि कानुनी समस्या नहोस् भनेर अध्यादेश तयार गरिएको जानकारी दिएका छन्।

उनले कोरोना सङ्क्रमितको उपचारमा सघाउन सरकारले भौतिक संरचना तयारीलाई पनि ध्यान दिएको बताए।

प्रदेश १ को सरकार, विराटनगर महानगरपालिका र निजी क्षेत्रको सक्रियतामा निर्माण भइरहेको ‘नागरिक केयर सेन्टर’को आज अनुगमनका क्रममा मन्त्री ढकालले कोरोना सङ्क्रमितको उपचारका लागि एचडीयू र अक्सिजनसहितको १०० शैय्याको नागरिक सेन्टरको निर्माण कार्य गरिएकोमा प्रशंसा गरे। उनले उपचारका लागि अक्सिजन, आईसीयू र भेन्टिलेटरको आवश्यकता देखिएकाले त्यसलाई प्राथमिकता राखिएको बताए।

मन्त्री ढकालले सरकारले सुविधा सम्पन्न तीन हजार ५०० शैय्या थप गर्ने तयारी गरेको जानकारी दिँदै दुई हजार काठमाडौं उपत्यका र बाँकी देशका विभिन्न स्थानमा स्थापना गरिने बताए।

प्रदेश १ का सामाजिक विकासमन्त्री जीवन घिमिरे, राज्यमन्त्री जसमाया गजमेर र सेन्टरका संयोजक पवन सारडालगायतले प्रदेश सरकारको दुई करोड, निजी क्षेत्रको एक करोड ५० लाख र महानगरपालिकाको २५ लाख रुपैयाँको लागतमा निर्माण कार्य भइरहेको जानकारी दिए। मन्त्री ढकालले आजै कोशी अस्पताल विराटनगरको पनि अनुगमन गरेका थिए।