काठमाडौँ- अमेरिकी राष्ट्रपतीय चुनावमा दुई उम्मेदवारबीच थोरै मात्र मतान्तर देखिएपछि जोर्जियामा हातैले फेरि मतगणना गरिने भएको छ ।

जोर्जियामा अमेरिकी राष्ट्रपति डोनल्ड ट्रम्प र राष्ट्रपति-निर्वाचित बाइडनबीच करिब १४,००० मतको अन्तर छ। निकै कडा प्रतिस्पर्धा देखिएका कारण उक्त राज्यले गत हप्ता नै पुनः मतगणना गरिने जानकारी गराएको थियो।

हातले नै मत गन्न अनुरोध गरेको ट्रम्पको चुनावी अभियान टोलीले पारदर्शीरूपमा गणना भए जित्ने दाबी गर्दै आएको छ ।

अभियानका कानुनी परामर्शदाता स्टेफन पासान्टीओले प्रत्येक भोटको जाँच गरिने बताएका छन् ।

दोहोर्‍याएर गरिएका मत गणनाले विगतमा खासै परिवर्तन भने नल्याएको अन्तर्राष्ट्रिय सञ्चार माध्यमहरूले जनाएका छन् ।

जोर्जिया राज्यमा हार नै बेहोरे पनि बाइडनसँग राष्ट्रपति बन्न आवश्यक २७० भन्दा बढी इलेक्टोरल मत पुग्नेछ ।