एजेन्सी – च्याम्पियन्स लिग फुटबल अन्तरगत क्वाटरफाइनलको दोस्रो लेगमा पराजित भएको म्यान्चेस्टर युनाइटेडका प्रशिक्षक ओले गनर सोल्सायरले आफ्नो टिम बार्सिलोनाको स्तरमा पुग्न चाहेको बताएका छन् ।

कप्तान लियोनल मेस्सीले दुई गोल गरेपछि सहज जीतको अवस्थामा पुगेको बार्सिलोनाले युनाइटेडलाई ३—० गोल अन्तरले पराजित गरेको थियो । पहिलो र दोस्रो लेगमा गरी युनाइटेड बार्सिलोनासँग ४—० गोल अन्तरले पराजित भएको छ ।

‘यदी तपाई म्यान्चेस्टर युनाइटेडको विगत हेर्नुहुन्छ भने यसको परम्परालाई हेर्न सक्नुहुन्छ । त्यो स्तरको खेल खेल्न सक्यौं भने हामी पक्कै पनि बार्सिलोनालाई चुनौती दिन सक्थ्यौं,’ सोल्सायरले भने,‘त्यस्तो अवस्थामा हामी दुवै खेलमा अगाडि हुनेथियौं ।’

मेस्सीले पहिलो हाफमा ४ मिनेटको अन्तरमा दुई गोल गरेका थिए । उनले खेलको १६ औं र २० औं मिनेटमा गोल गरेका थिए भने फिलिपे कोन्टिन्होले खेलको ६१ औं मिनेटमा गोल गर्दै बार्सिलोनालाई ३—० को फराकिलो जीत दिलाए ।

युनाइटेडले भने खेलका दौरान आफ्नो विपक्षीविरुद्ध निकै संघर्ष गर्नु परेको थियो । युनाइटेडले च्याम्पियन्स लिगका दुई लेगमा जम्मा तीन सर्ट मात्रै सटअन टार्गेटमा प्रहार गरेको थियो ।

‘मैले मेस्सी शीर्ष खेलाडी हुन् भनेको थिए । उनीसँग क्षमता छ । जुन कुरा उनले ४ मिनेट भित्र दुई गोल गरेर देखाइसकेका छन् । उनको दुई गोलसँगै खेल बार्सिलोनाको हात लागिसकेको थियो,’ सोल्सायरले भने,‘उनी छुट्टै क्षमताका खेलाडी हुन् । उनी र क्रिष्टियानो रोनाल्डो दुवै पछिल्लो दशकका उत्कृष्ट खेलाडी हुन् । यो विषय सबैले स्वीकार्दै आएका छन् । मेस्सीले आफ्नो क्षमता देखाए ।’