नेपाल र भारतमा हिन्दु धर्मालम्बीको वर्चश्व छ । यी दुबै देशका गल्ली गल्ली भगवानको मठ मन्दिर भेटिन्छ । तर कट्टर मुस्लिम देश पाकिस्तानमा देवीको मन्दिर छ भन्दा कसलाई पत्यार लाग्ला ?

पाकिस्तानमा नेपाल र भारतमा झै एक शक्तिपीठ छ, जहाँ केवल हिन्दु मात्र होइन मुस्लिमले समेत आस्था राख्दछन् ।

पाकिस्तानको बलूचिस्तानबाट १२० किलोमिटर टाढा रहेको हिंगुल नदीको तटमा अवस्थित हिंगलाज मन्दिर रहेको छ । पौराणिक मान्यता अनुसार भगवान शिव माता सतीको लाश बोकेर डुल्दा यस स्थानमा शिर खसेको थियो । जहाँ हिंगलाज माताको मन्दिर निर्माण भयो ।

पाकिस्तान बन्नु भन्दा पहिले भारतको पश्चिमी सीमा अफगानिस्तान र ईरानसम्म थियो । त्यस समय हिंगलाज मंदिर हिन्दुको प्रमुख तीर्थ स्थलमा पर्दथ्यो । अहिले यस मन्दिरमा मुसलमानले समेत हिंगला देवीको पूजा गर्दछन् ।