काठमाडौँ- नेपाल उद्योग वाणिज्य महासंघका वरिष्ठ उपाध्यक्ष शेखर गोल्छाले महासंघभित्रको राजनीतिक विकृति हटाउनुपर्ने बताएका छन् ।

महासंघलाई पूर्व अध्यक्षहरुले राजनीति गर्ने थलो बनाएकोतर्फ इङ्गित गर्दै वरिष्ठ उपाध्यक्ष गोल्छाले अब निर्वाचित व्यक्तिहरुले नै महासंघलाई हाँक्नुपर्ने बताए ।

महासंघको वरिष्ठ उपाध्यक्षका प्रत्यासी किशोर प्रधानले उम्मेदवारी घोषणा कार्यक्रमलाई सम्बोधन गर्दै उनले राजनीति गर्न नभई काम गर्न आएको समूहलाई आफूले रोजेको स्पस्ट पारे ।

वरिष्ठ उपाध्यक्ष गोल्छाले निजी क्षेत्रको सेवा गर्न आफूहरु सक्षम हुने  विश्वास व्यक्त गरे ।

‘उद्योग वाणिज्य महासंघमा एउटा क्यान्सर फैलिएको छ। राजनीतिको क्यान्सर। अबको समयमा हामीले त्यो क्यान्सरलाई निकाल्न सक्नुपर्छ। जो निर्वाचित व्यक्तित्वहरु हुनुहुन्छ उनीहरुले नै उद्योग वाणिज्य महासंघ हाँक्न सक्नुपर्छ’, उनले भने, ‘अरु कोही व्यक्ति जो निर्वाचित छैनन उनीहरुको कुनै चलखेल हामी उद्योग वाणिज्य महासंघमा हुन दिदैनौँ। किन भने यो सबै विकृति हो भन्ने मलाई लाग्छ।’

सबै पूर्व अध्यक्षहरूसँग सल्लाह र सुझाव लिने तर उनीहरुको राजनीतिमा नपर्ने गोल्छाले बताए ।

निर्वाचित हुनेहरु मात्रै मतदाताप्रति उत्तरदायी हुने भएकाले आफूले नेतृत्व गर्ने समूह अहिलेसम्म भएका राजनीतिक विकृति विसंगति हटाउन सफल हुने बताए ।