काठमाडौँ- भारतको उत्तर प्रदेशका मुसलमान समुदायका प्रहरीलाई अनुमति बिना दारी पालेको भन्दै निलम्बित गरिएको छ ।

बागपतस्थित एक मुसलमान सब-इन्स्पेक्टरलाई विनाअनुमति दारी राखेर अनुशासन पालन नगरेको भन्दै निलम्बन गरिएको हो ।

बागपत थाना रमालाका सब-इन्स्पेक्टर इन्तेसार अली निलम्बनमा परेसँगै साम्प्रदायिक निर्णय गरेको भन्दै उक्त निर्णय विवादित भएको भारतीय सञ्चार माध्यमहरूले जनाएका छन् ।

उत्तर प्रदेशका प्रहरी अधिक्षक अभिषेक सिंहले कानूनको दायरामा रहेरै कारबाही गरेको प्रष्ट्याएका छन् ।

सइ अलीले भने आफूले गएको वर्ष नोभेम्बरमा नै दारी राख्न अनुमति मागेको भए पनि नदिइएको बताएका छन्। जरुरी परे आफू अदालत पनि जान तयार रहेको उनलाई उद्धृत गर्दै बीबीसी हिन्दीले जनाएको छ ।