काठमाडौं- नेपालको पहिलो छायाँकार वैकुण्ठमान मास्केको निधन भएको छ । सात वर्षदेखि मृगौलाको रोगी मास्केको उपचारकै क्रममा शुक्रबार निदान अस्पतालमा ८३ वर्षको उमेरमा मृत्यु भएको हो ।

नेपाल चलचित्र प्राविधिक संघका अध्यक्ष पुस्कर लामाले भने, ‘उहाँ हप्ताको तीन पटक डायलाइसिस गराउनु पर्थ्‍यो । आइतबार कोरोना पुष्टि भयो । त्यसयता निदान अस्पतालमा उपचार गराउँदै गर्दा उहाँले शुक्रबार १:३० मा संसार छोड्नु भयो ।’

उनका श्रीमती र एक छोरी छन् ।

मास्केले सन् १९६६ मा ‘फिल्म एण्ड टेलिभिजन इन्स्टिच्यूट अफ इन्डिया’बाट छायांकनमा ३ वर्षे अध्ययन सकाएका थिए ।

उनले छायांकनसँगै निर्देशन र सम्पादनमा पनि आफ्नो अनुभव बटुलेका थिए । ‘ट्रान्सपोर्टेसन नेपाल’ र ‘बाँच र बाँच्न देऊ’ उनले निर्देशन गरेका वृतचित्र हुन् ।