काठमाडौं – कलाकार उपासना सिंह ठकुरी फिल्म ‘क्याप्टेन’ बाट एकाएक चर्चामा रहिन् ।

अनमोल केसीको समेत अभिनय रहेको यो फिल्मले व्यावसायिक सफलता हात पार्न नसके पनि उपासनालाई भने सफलता दिलायो ।

पहिलो फिल्मबाटै चर्चा बटुल्न सफल कलाकार हुन् उपासना । उनलाई फिल्मबाट शीर्ष भूमिकाका लागि प्रस्तावहरू आइरहेका छन् । तर, कोरोना कहरअघि उनले पढाइका लागि ब्रेक दिएको भन्दै केही महिना फिल्ममा काम नगर्ने बताएकी थिइन् ।

लकडाउनपछि पनि उनलाई निरन्तरजसो फिल्ममा अफर आइरहेका छन् । उपासनाले शुक्रवार एजुकेशन एण्ड माइग्रेसन कर्नरको ‘ब्रान्ड एम्बास्डर’ मा नियुक्त गर्ने कार्यक्रममा बोल्दै लकडाउनयता मात्र आठवटा फिल्मबाट अफर आएको दाबी गरिन् ।

‘मलाई लकडाउनपछि पनि ८/९ वटा फिल्मबाट अफर आयो, तीमध्ये २ वटा स्किृप्टको वानलाइन स्टोरी मन परेको छ,’ उनले भनिन् ।

उपासनाले कोरोना महामारीका कारण सिर्जित अवस्था सामान्य भएपछि कुनै एक फिल्ममा काम गर्ने सोच बनाएको पनि बताइन् ।

यसअघि उपासनाले अभिनय गरेको फिल्म ‘कबड्डी ३’ ले राम्रो प्रतिक्रिया पाएको थियो । फिल्मबाट उपासनाको कामको पनि तारिफ भएको थियो ।