काठमाडौँ– प्रमुख प्रतिपक्ष दल नेपाली कांग्रेसले अनसनरत डाक्टर गोविन्द केसीको माग पुरा गर्न सरकारसँग माग गरेको छ ।

अनशनमा बसेको २४ दिन पुगेपनि सरकारले वार्ता समितिसम्म गठन नगरेको भन्दै कांग्रेसले आलोचना गरेको छ ।

कांग्रेस प्रवक्ता विश्वप्रकाश शर्माले प्रेस विज्ञप्ति जारी गर्दै भनेका छन्, ‘कुनै बेला कमरेड प्रचण्डहरुको बन्दुकको विद्रोहलाई कटु आलोचना गर्नुहुन्थ्यो त्यो स्वभाविक थियो, अब अनशन जस्तो शान्तिपूर्ण सत्याग्रहलाई समेत सुन्न अस्वीकार्य गर्दै हुनुहुन्छ । खुल्ला ढंगले के यो सन्देश दिन चाहनु भएको हो कि- लोकतान्त्रिक प्रक्रियाबाट निर्वाचित हुनु र लोकतान्त्रिक चरीत्रको हुनुमा फरक हुन्छ ?’

कांग्रेस सरकारमा रहेका बेला अनसनमा बसेका डाक्टर केसीका धेरै माग सम्बोधन भएको उल्लेख गर्दै प्रवक्ता शर्माले जारी गरेको विज्ञप्तिमा भनिएको छ, ‘डा. केसीको स्वास्थ स्थिति जटिल बन्दै गएको छ । वार्ता नगर्ने बालुवाटारे बालहठ यहाँलाई महँगो पर्नेछ प्रधानमन्त्रीज्यू । हेक्का रहोस् लोकतन्त्र भर्सेस ‘कम्युनिष्टतन्त्र’ मा अन्ततः जित लोकतन्त्रकै हुनेछ । डा. केसीको जायज आवाजलाई सम्बोधन गर्न ढिलाइ गर्ने गम्भीर भुल किमार्थ नगरियोस् ।’