मुम्बइ– बलिउड अभिनेता सुशान्त सिंह राजपुतको बैंक खाताको फरेन्सिक अडिट रिपोर्ट आएको छ । सूत्रको हवाला दिँदै दैनिक भास्करले लेखेअनुसार सुशान्तका सबै बैंक खातामा विगत ५ वर्षमा ७० करोड रुपैयाँको लेनदेन भएको छ ।

यीमध्ये केवल ५५ लाख मात्रै रिया चक्रवर्तीसँग सम्बन्धित पाइएको छ । अधिकांश रकम यात्रा, स्पा र गिफ्ट खरिदमा खर्च भएको पाइएको छ ।

आत्महत्याको केस स्पष्ट भएपछि सीबीआइले अब यसको कारणबारे अनुसन्धान गर्नेछ । आत्महत्यामा रिया चक्रवर्ती र उनका भाइको भूमिका, बलिउडमा व्यवसायिक प्रतिद्वन्द्वीता र भाइ भतिजावाद, नशालु पदार्थको दुरुपयोग र सुशान्त सिंह राजपुतको मानसिक स्वास्थ्यको कोणबाट अनुसन्धान अगाडि बढ्नेछ ।

उता ड्रग्स केसमा भायखाला जेलमा रहेकी रिया चक्रवर्तीविरुद्ध सुशान्तका पिता केके सिंहले १५ हरोड रुपैयाँ बराबरको घोटाला केस पटनामा दर्ता गराएका छन् ।

यसको संज्ञान लिँदै इडीले मनी लण्ड्रिङ केस दर्ता गरेको छ । इडीले रिया चक्रवर्तीसँग ३ पटक सोधपुछ गरेको छ । इडीले अहिलेसम्म आफ्नो अन्तिम रिपोर्ट सार्वजनिक गरेको छैन । यही केसको जाँचको क्रममा सुशान्तका बैंक खाताको फरेन्सिक अडिट गरिएको थियो ।

सूत्रका अनुसार यो रिपोर्ट सिबिआइलाई पनि उपलब्ध गराइएको छ । यो रिपोर्टमा कहीँ पनि रियाले यो पैसा आफ्नो वा आफ्नो परिवारको लागि निकासी गरेको प्रमाणित नहुने बताइएको छ । धेरैजसो पैसा सुशान्तको इच्छाले वा उनको जानकारीमा खर्च गरिएको छ । यो पैसा सुशान्तको आम्दानीको तुलनामा निकै कम छ । यद्यपि खातासँग सम्बन्धित केही जानकारी अझै सार्वजनिक हुन बाँकी छ ।