काठमाडौं– सरकारले त्रिभुवन अन्तर्राष्ट्रिय विमानस्थललाई बुटिक विमानस्थलका रुपमा बनाउने योजना अघि सारेको छ । २०७६ साल बैशाख १ गते नयाँ वर्षको अवसर पारेर त्रिभुवन अन्तर्राष्ट्रिय विमानस्थललाई ‘बुटिक विमानस्थल’  बनाइने घोषणासहित औपचारिक कार्यक्रम राखिएको छ ।

कार्यक्रमको प्रधानमन्त्री केपी शर्मा ओलीले उद्घाटन गर्नेछन् । त्यसका लागि आवश्यक तयारी पूरा भएको विमानस्थलका महाप्रबन्धक राजकुमार क्षेत्रीले जानकारी दिए ।

प्रधानमन्त्री केपी शर्मा ओलीले सन् २०२० मा आयोजना हुने नेपाल भ्रमण वर्षलाई समेत सफल बनाउन नेपाली कला, संस्कृति र ऐतिहासिकता झल्कने गरी त्रिभुवन अन्तराष्ट्रिय विमानस्थललाई बुटिक विमानस्थलको रुपमा परिणत गर्न लागिएको यस अघि नै घोषणा गरेका थिए ।

सोही घोषणालाई मुर्तरुप दिन बनाउने विमानस्थलले अल्पकालीन र दीर्घकालीन योजनाहरु पनि तय गरेको छ ।

बुटिक विमानस्थल बनाउन नेपाल नागरिक उडड्यन प्राधिकरणले त्रिभुवन अन्तराष्ट्रिय विमानस्थललाई हाल ७ करोड ५० लाख बजेट उपलब्ध गराएको  महाप्रबन्धक क्षेत्रीले जानकारी दिए । उनले बुटिक विमानस्थलका लागि ४५ करोड थप बजेट पनि विनियोजन भएको पनि जानकारी दिए ।

एक वर्ष भित्र बुटिक विमानस्थलको रुपमा विकास गर्न लागिएको सो विमानस्थलको भवनहरुका छाना पनि नेपाली कला र संस्कृति झल्कने राखिनेछन् ।