पाँचथर– भौतिक पूर्वाधार तथा यातायात मन्त्री बसन्त कुमार नेम्वाङले काममा ढिलाइ गर्ने ठेकेदारहरुलाई कडा कारबाही हुने बताएका छन् । उनले सरकारले ढिलासुस्ती गर्नेलाई कारबाही गर्ने काम सुरु गरेको पनि बताए ।

जिल्ला सभाको उद्घाटन गर्न गृहजिल्ला पाँचथर पुगेका मन्त्री नेम्वाङले अब कसैले कुनै पनि बहानामा ढिलासुस्ती गर्न नपाउने बताए । उनले भने, ‘सरकारले उनीहरुको कबोल अनुसार पैसा दिएर निर्माणको ठेक्का दिएको हुन्छ । त्यो उनीहरुले समयमा सक्नुपर्छ । उनीहरुले काम नसक्दा गाली सरकारले खानुपर्छ । अब यस्तो हुँदैन । ढिला सुस्ती गर्नेलाई कडा कारबाही हुने छ ।’

उनले नेपालमा पूर्वाधार विकासको कामले पनि गति लिएको बताए । अहिले देश कोभिडको महामारीसँग जुँधिरहेको भन्दै उनले सरकारको लक्ष्य अनुसार काम अघि बढ्ने स्पष्ट पारे ।

नेपाल ल्याएर थन्किएको रेलको प्रसंग उठाउँदै उनले रेल नेपालको आवश्यकता भएको बताए । अहिले देश कोभिडको महामारीसँग जुँधिरहेको भन्दै उनले कोभिड अन्त्य भएसँगै प्रभावकारी रुपमा सञ्चालन गर्ने बताए ।

देश समृद्धिको बाटोमा अघि बढेको बताउँदै मन्त्री नेम्वाङले सबैले आ आफ्नो क्षेत्रबाट योगदान पुर्‍याउनुपर्ने बताए।