काठमाडौँ– इङ्ग्लिस प्रिमियर लिगमा म्यान्चेस्टर युनाइटेडले ब्राइटनविरुद्ध जीत हात पारेको छ । शनिबार राति भएको खेलमा युनाइटेडले ब्राइटनलाई ३–२ गोल अन्तरले पराजित गरेको हो ।

रोमाञ्जक बनेको खेलमा युनाइटेडले एक गोल उपहार पाएको थियो । खेलमा सुरुवाती अग्रता बनाएको ब्राइटनले अग्रता जोगान नसक्दा हार व्यहोर्न पुग्यो ।

खेलको ४० औं मिनेटमा ब्राइटनका निअल मेउपेले गोल गर्दै अग्रता दिलाएका थिए । तर, ब्राइटनका लेविस डङ्को आत्मघाती गोलमा युनाइटेडले खेल १–१ को बराबरीमा ल्याएको थियो । डङ्कोले खेलको ४३ औं मिनेटमा आत्मघाती गोल गरेका थिए ।

१–१ बराबरीको अवस्थामा रहेको खेलमा युनाइटेडका मार्कस रासफोर्डले टीमका लागि दोस्रो गोल गरेका थिए । उनले खेलको ५५ औं मिनेटमा गोल गर्दै २–१ को अग्रता दिलाएका थिए ।

युनाइटेडविरुद्ध खेलको अतिरिक्त समयमा ब्राइटनका सोली मार्चले गोल गर्दै खेल २–२ गोलको बराबरीमा पुर्याएका थिए ।
तर, अतिरिक्त समयमै ब्राइटनका खेलाडीले पेनाल्टी क्षेत्रमा विपक्षी खेलाडीमाथि फाउल गर्दा युनाइटेडले पेनाल्टी पाएको थियो ।

उक्त पेनाल्टी अवसरलाई ब्रुनो फर्नान्डेजले गोलमा परिणत गर्दै रोचक बनेको खेलमा टीमलाई जीत दिलाए ।
दुई खेलमा एक जीत हात पारेको युनाइटेडले अंक तालिकामा खाता खोलेको छ भने ब्राइटनले ३ खेलमा एक जीत हात पारेकोछ ।