काठमाडौं – जाल्टन इब्रामोभिचको दुई गोलमा एसी मिलानले बोलोग्नालाई पराजित गरेको छ ।

इटालीयन सिरी ए मा सोमबार राति भएको खेलमा एसी मिलानले बोलोग्नालाई २–० गोल अन्तरले पराजित गरेको हो ।

सुरुदेखि नै आक्रामक बनेको एसी मिलानका लागि अनुभवी खेलाडी इब्रामोभिचले खेलको ३५ र ५१औं मिनेटमा गोल गरेका हुन् ।

थिओ हर्नान्डेजको असिस्टमा पहिलो गोल गरेका उनले दोस्रो गोल भने पेनाल्टीमार्फत् गरेका हुन् ।

बोलोग्नाका खेलाडीले एसी मिलानका खेलाडीलाई पेनाल्टी क्षेत्रमा फाउल गरेपछि पेनाल्टीको अवसर पाएको थियो ।

उक्त पेनाल्टी प्रहार गरेका इब्रामोभिचले अवसरको सदुपयोग गर्दै व्यक्तिगत तथा टिमका लागि दोस्रो गोल गरेका हुन् ।

सिजनको पहिलो खेलमा दुई गोल गर्दै इब्रामोभिचले राम्रो सुरुवात गरेका छन् भने टोलीले पनि जितसँगै नयाँ सिजनको सुरुवात गरेको छ ।

जित हात पारेको एसी मिलानले अंक तालिकामा खाता खोलेको छ भने पराजित ओलोग्नाको पहिलो खेलमा भने हार बेहोरेको छ ।