कोरोना भाइरस (कोभिड–१९) ले सारा विश्व उथलपुथल भएका बेला रुसी वैज्ञानिकहरुले विश्वकै पहिलो कोरोना भ्याक्सिन विकास गरेको दाबी गरे ।

यो खबरले आंशिक रुपमा खुशी ल्याए पनि तेस्रो परीक्षण नगरिँदै खोप दर्ता गरिएको भन्दै विरोध पनि भयो ।

अझै पनि परीक्षणकै क्रममा रहेको यो खोपले ‘साइड इफेक्ट’ देखाएको छ ।

‘स्पुतनिक भी’ नाम दिइएको यो कोरोना भ्याक्सिनले साइड इफेक्ट देखाएको दाबी गरिएको छ । परीक्षणका क्रममा सहभागी भएका ७ जनामध्ये १ जनामा असर देखिएको रुसका स्वास्थ्यमन्त्री मिखाइल मुरास्कोले बताएका छन् ।

मुरास्कोले मस्को टाइम्सलाई दिएको अन्तर्वार्ताका अनुसार कूलमध्येका १४ प्रतिशतमा यसको असर देखिएको छ ।

समाचारका अनुसार त्यस्तो असर देखिएकालाई शरीर कमजोर भएको महसुस हुने, माशंपेशी दुख्नेजस्ता समस्या देखिएको बताइएको छ । स्वास्थ्यमन्त्रीका अनुसार त्यस्ता असर भने केही दिनमै देखिन छाडेको थियो ।