काठमाडौं – स्वास्थ्य उपकरण खरिद प्रक्रियामा अनियमिता गरेको भेटिएपछि विवादमा तानिएको ओम्नी (ओम्नी बिजनेस कर्पोरेट इन्टरनेशनल) समूह कालोसूचीमा परेको छ ।

सार्वजनिक खरिद अनुगमन कार्यालय काठमाडौंले एक सूचना प्रकाशित गर्दै उक्त समूहलाई कालोसूचीमा राखेको जनाएको हो । यो समूहले अब १ वर्ष कुनै पनि खरिद प्रक्रियामा सहभागिता जनाउन नपाउने गरी कालोसूचीमा राखिएको छ ।

ओम्नीलाई कालोसूचीमा पर्न नदिन राजनीतिक चलखेल भएको थियो । यो खबर बाहिरिएपछि जनस्तरबाट सरकारको व्यापक विरोध भएको थियो ।

सार्वजनिक खरिद अनुगमन कार्यालयले स्वास्थ्य सेवा विभागको सिफारिसमा कालोसूचीमा राखेको हो ।

सार्वजनिक खरिद ऐन, २०६३ को दफा ६३ को उपदफा (१) बमोजिम कालोसूचीमा राखिएको जनाइएको छ ।

नेपालमा कोरोना भाइरसका संक्रमण देखिएसँगै सरकारले विना प्रतिस्पर्धा ओम्नी समूहलाई चीनबाट स्वास्थ्य उपकरण ल्याउन सम्झौता गरेको थियो ।

त्यसपछि विना प्रतिस्पर्धा महंगो मूल्यमा उपकरण खरिद गरेको भन्दै सरकारको चर्को आलोचना भएको थियो ।

विवाद भएपछि स्वास्थ्य सेवा विभागले गत चैत्र १९ गते ओम्नीसँगको खरिद सम्झौता रद्द गरेको थियो ।

ओम्नी समूहले स्वास्थ्य साम्रगी ल्याउँदा भ्रष्ट्राचार गरेको खुलेपछि सरकारले औषधि खरिद प्रक्रिया नेपाली सेनलाई जिम्मा दिएको थियो ।