एजेन्सी- क्यारेबियन प्रिमियर लिगको आठौं संस्करणको उपाधि ट्रिनबागो नाइट राइडर्सले उचालेको छ ।

बिहीबार राति भएको खेलमा ट्रिनबागोले सेन्ट लुसिया जोउक्सलाई ८ विकेटले पराजित गर्दै चौथो पटक उपाधि हात पारेको हो ।

यो सिजनको विजेता बनेको ट्रिनबागो अपराजित रहँदै लिगको उपाधि उचाल्न सफल भएको छ । उसले लिग चरणदेखि फाइनलसम्म गरी कुल १२ खेल खेल्दा सबै खेलमा जीत हात पारेको हो ।

ब्रायन लारा क्रिकेट स्टेडियममा सेन्ट लुसियाले दिएको १ सय ५५ रनको लक्ष्य ट्रिनबागोले १८ ओभर १ बलमा मात्र २ विकेट गुमाएर भेट्टायो ।

ट्रिनबागोको जीतमा लेन्डेल सिमोन्सले अविजित रहदै ८४ रनको अर्धशतकीय इनिङ्स खेले । यस्तै डरेन ब्राभोले पनि अविजित ५८ रनको आर्शशतकीय इनिङ्स खेले ।

यसअघि टस हारेर पहिले ब्याटिङ गरेको सेन्ट लुसियाले १९ ओभर १ बलमा अलआउट हुँदै १ सय ५४ रन बनाएको थियो । सेन्ट लुसियाका आन्द्रे फलेट्चरले ३९ रन जोड्दा मार्क डियालले २९ रन जोडे ।

ट्रिनबागोका केइरन पोलार्डले ४ विकेट लिए । अली खान र फावाद अहमेदले २/२ विकेट लिए ।